Awa den dos movementu

Un gota di awa
a kai for di finfin di mardugá
riba bo kara bistí na soño,
kore keiru den hilu líkido
riba finura delikado di bo piel, 
baha frei rònt di bo pechu,
bai drumi den kalor di bo lombrishi.

Rosea di serena,
muhá di bo kurpa kayente,
gota di kada suspiro di mi bida,
laman di pashon ku a pari nos
for dje awa den matris di nos mama …
bin, bin tapa mi atrobe
ora mi grita den sukú
i sodó baster fo’i mi porio,  
salga mi ku sustu saturá ku sumpiña.
Mi ke pa tur e awanan di mundu
hiba mi bèk den dushi skochi di mi mama,
kaminda lo mi biba den kueba di su amor.

Joseph ‘Jopi’ Hart