Amor mi no sa

Si bo puntrami awo’ki kiko amor ta,  mi no sa.
pero mi ke imaginá ku..

Den un mundu robes pa drechi, un amor ku ta wak mas ayá di mi robes, i ta buska mi drechi.
Interesá den mi bienestar, sin interes propio. Ku asta ora mi no tin nada mas pa duna e ta habri brasa i bisami at’akí bin tuma.
Mi no sa..

Den un mundu ku ta kòu mi skupimi bèk, un amor manera bálsamo riba mi herida.
Un amor ku ta kura i ta tresemi bèk na bida.
Un amor ku ta pone ku mi ke biba pa stima.
Wak mi awor, rebibá
pero mi no sa..

Un amor sigur i saturá ku vulnerabilidat, i nos por komuniká mas kla ku di dia, e no ta lagami den skuridat.

Un amor di awor, yená ku bunita nostalgia di ayera i kargá ku speransa pa mañan.

Un amor ku no ta solamente mirami i skuchami ku djis wowo i orea, pero ku ta studiami manera mi t’un universo yená ku strea.

Un amor ku no konosé soledat, konsistente manera nochi i dia tin – “luna ku solo”- no lagami na pas.

Un amor kaminda asta mi pas ta na pas.

Un amor kaminda mi úniko pena ta di no sa kuantu a sobra nos huntu pero mi ta spera un eternidat.

Enfin, mi no sa pero ora bo puntrami kiko amor ta, esei ta loke mi ta deseá.

Un amor asina.
Un amor ku ta pone ku mi ke eksperensiá, loke mi no sa.

Rebibá