Amigu di kurason

Tin insidente kurioso ta pasa den bida, efekto inesperá di kos ku bo por a hasi òf keda sin hasi hopi tempu pasá, resultado di relashon ku nunka bo no por a kere lo tin e konsekuensha ei.
Un tempu, durante un kurso basta intenso ku mi tabata duna un grupo di persona, m’a sinti ku un di nan, un dama basta hóben ainda, divorsiá i ku dos yu, tabatin difikultat di habri su mes pa relashon ku e otro personanan den e grupo, prinsipalmente hende hòmber, i tabata skonde su feminidat tras di un maskarada di muhé wapu, reakshonando riba kualke muestra genuino di kariño ku rechaso i sierto agresividat sin nodi.
I tòg mi tabata mira den su hasí un nesesidat, maske kon skondí, di aserkamentu, di komprenshon, di un orea ku sí por skucha e kehonan silensioso ku e tin tapá asina profundo paden. I m’a sinti ku mi tin ku ofresé di mi.
M’a splik’é loke mi ta mira,  i logra konvens’é ku e por habri su kurason ku mi sin miedu di traishon, ku e por pèrmití su mes numa di ta muhé ku tur e plaser i e dolónan, tur e vulnaribilidat ku esei ta trese kuné. M’a lag’é papia mas ku mi mes a papia kuné. I pronto m’a kuminsá mira sierto kambio leve. Un sonrisa ínboluntario, un palabra kontentu k’a logra slep hui for di su boka. E kurso sinembargo a kaba, i nos relashon amistoso a bira unu djaleu, ku kontakto kariñoso ounke sporádiko.
Un shete aña asina despues pa un presentashon di mi poesia mi mester tabata na un otro pais kaminda ela bai biba, i el a yamami na e hotèl kaminda mi tabata keda. Despues ku nos a kumindá otro ku mashá smak, e di ku mi: “Awor ku bo t’aki, e biaha akí sí bo no ta skapa di mi!” Ami, ku no a komprondé e insinuashon, a hari i kontestá ku mi tambe tin gana di mir’é, i nos a kumbiní ku e lo a pasa buskami na un akto ofisial kaminda mi mester tabata presente anochi pa nos kòmbersá i konta otro kon a bai ku nos bida despues.
E nochi ei tabata difísil pa mi kere mi wowo. M’a topa un muhé nobo, bunita, diferente, ku tabata vibra konfiansa i radia feminidat. Na momentu ku nos a drenta sinta den su outo, ela sorprendé mi ku e palabranan: “Pakiko e tempu ayá bo no a buska pa drumi ku mi? Mi tabatin hopi deseo pa bo a hasié.” Mi mester a keda ketu un ratu, pa mi por a dominá mi sorpresa, i rekuperando m’a kontest’é: “I ami tabatin mes deseo. Pero lo tabata un abuzu di bo konfiansa i di e influensha ku mi tabatin riba bo e momentu ei. I bo mester ta konosé mi mihó ku esei. I ademas, mi tabatin miedu di bo reakshon. Bo no tabata kla pa un relashon kasual i e por a bira un “Fatal attraction” di bo parti, algu ku ni maske kuantu deseo mi por tabatin di bo, ni ami ni abo no por a riska.” 
El a reakshoná: “Ma awor ta otro. Abo ta e hòmber ku a hasimi muhé mentalmente. Mi bista riba bida a kambia i awor mi ta biba i gosa di e kambio ku bo a yudami logra. Mi no tin ripara mas di mi sekso, kontrali. I mi ke kompletá e kambio ei awe. Mi ke hasi amor ku bo. Amor di amigu íntimo. Tierno, ku amistat pero ku pashon i legria tambe. Mi ke nos gosa i hari kontentu, kurpa ku kurpa den otro su brasa. Awe so. Un biaha so, pa mi seya e relashon mental ku nos tin ku otro ku un selebrashon físiko. Kaba nos ta sigui komo amigu, manera promé.”
I awe, despues di tantu tempu, ounke djaleu, ainda nos ta amigu di kurason i persona di konfiansa di otro.

Philp ‘Fifi’ Rademaker