Agradesido

Agradesido ku e aña aki ta bai kaba i mi ta den doló.
Mi n’ por kambi’é pasó doló no ta pasa unbes.
Pero tampoko mi ta despresi’é pasó pa ami doló ta e evidensia inevitabel ku m’a sinti, m’a eksperensiá, m’a biba.
Agradesido ku m’a sinti kiko ta eksperensia di bida.

Agradesido
Agradesido ku ainda fe ta e siguransa di kos ku mi no ta mira.
Pasó pa ta franko, mi no sa kiko lo m’a hasi si tabata pa mi mes bista.

Agradesido ku mi tin e abilidat i kapasidat pa ta agradesido
E echo ku mi por mira e bon den e malu
Aunke n’ ta tur ora mi por mira e mondi dor dje palu
Pero un kos sí, kada bes malagradesí sali foi dje porta ei ta stroi’é k’un tiki salu.

Agradesido
Agradesido ku e aña akí mi kurason a wòrdu toká, e ta balia ainda.
Bareranan a wòrdu kibrá i soñonan a wòrdu realisá. 

Agradesido ku un aña mas mi por ta artista pa i riba mi isla
Porfin e pista di mi soñonan a kuminsá toka i kreatividat a saka man pidi mi kurason pa dansa i ekspresá, di e manera ku pa años e tabata anhelá, el a aseptá.. i ta mané m’a haña un bida.
P’esei mi ta rebibá.. pa mi esei ta bida.

Rebibá