Lamento

Ku inmenso doló i tristesa mi ta partisipá fayesimentu di ‘Alfredo Ningabon Mentiroso’, mihó konosí komo ‘Fredo, kasá di Iona’.
Alfredo, kua ta e nòmbernan ku mi tin ku pone n’e kabesito ‘Yunan’?
Bisami, pasó a bèl un tal Sharitee, bisa ku e tambe ta yu.
Bisami, pasó Sharitee di ku e tin 5 ruman muhé mas ku tambe ta yu.
El a nami nan nòmber: Sharitee, Sharmaline i Sharmila…ta esunnan ku mi por a kòrda.
Alfredo nan ta mayó di nos yunan? Òf meimei? Òf kisas nan ta despues ku mi a haña e ‘kuarteto’ ku mi tin ku bo? 

Alfredo, un tal Chichi tambe a bèl.
E di bo deb’é sèn di sam. M’a bis’é ku bo ta defuntu.
E di ku no ta nada, e ta sigui kobra tòg, pasó sam ta sigui kore.
M’a puntr’é si ami tambe ta kobra ora bo turno di kobra yega. E di ‘Nò’!
M’a puntr’é di kon. E di mi puntrabo. M’a bis’é ku defuntu no sa papia.
E di awèl bo a laga un pida ‘herensia’ serka dje ku aki kuater luna lo mira lus di dia.
E ta deseá un mucha hòmber, pasó e ora ei e lo yam’é ‘Alfredito’. I e sèn di sam lo sirbi net pa kubri gastu di parto!
Den tur esei Chichi tambe ke bini entiero, pa wak bo kara pa delaster bia.
Alfredo bo mes no por a bisami, pa mi sa? 

Alfredo, Fifi bo kòmpèr a pasa.
El a pasa un pasá drenta ket, sali man yen di hèrmènt. E di ta di dje nan ta. M’a bis’é ku ta gaña e ta gaña, pasó mi mes tabata den outo sintá dia ku bo a kumpra nan. E di ta bèrdat ku Alfredo a kumpra nan sí. Pero komo ku awor el a haña sa ku Alfredo tabatin algu ku Linda, su kasá, Fifi ta haña ku bo deb’é. P’esei el a bin pasa piki.
Alfredo bo mes no por a bisami di Linda?
‘Linda-sin-heful’, ku tabata pasa tur wikènt bin bebe kòfi serka nos. TUR WIKENT!!!
E ora ei bosnan tabata traha sita pa topa, nò, Alfredo? 

Awor ‘Shishi’ bo Mama di pa no pone nòmber di ‘Shon Ki’ komo bo tata, pasó Shon Ki NO ta bo tata. Tur e añanan ku m’a kere ku Shon Ki ta bo tata.
Ai, esta hopi kos, awor ku morto a kai. Esta hopi kos!
Ora m’a puntra ta ken ta bo tata antó, Shishi a keda ketu i el a duna lomba. 
Awor mi ta komprondé di unda e fam ‘Mentiroso’ ta bin. Ta di Shishi, i no di Shon Ki manera m’a kere semper. Shishi Mentiroso!
Dios warda hende; ki famia brua m’a drenta?

Alfredo, e kartanan a yega pareu. Bo debe belasting-hipotek-lus-i-awa. Un tal Mariela “Deurwaarder” di bo pasa paga. Mi di ku bo a fayesé. E di no ta nada, pasó bo debenan ta di mi awor.
Kon? Unda mi ta kuminsá kue? Di unda mi ta saka pa duna? Ni bo entiero no ta pagá ainda!
Alfredo bisami si mi tin ku hisa matras buska e sak’i papel brùin ku sèn aden. M’a tende ku chinesnan sa warda sèn asina. Alfredo bo tabata kome hopi kuminda chines; nan no a siñabo e triki ei?  

Alfredo, Elfa tambe a pasa, pa wak si ta galiña ta mata duna hende kome dia di entiero. Mi di ‘nò’, ta kabritu hinté m’a bestèl. M’a asta pasa tranké kaba, skohe esun ku mi ke. E di ku un tal Lechi-Ladron a pasa den bario ayera mardugá i ku yen kabritu a disparsé.
Ami mes no konos’é, pero Elfa di ku Lechi tin hopi paresido di bo. Bosnan tur dos ta kana lomba doblá.
Alfredo, ta ken ta Lechi?
Alfredo, ta ken ta Lechi su Mama?
Alfredo, bo a pasa ei banda tambe?
Alfredo, Lechi ta kana lomba doblá dor di tur e kabritunan hòrtá ku el a karga riba lomba?
Alfredo, abo tabata kana doblá pasó bo tabata yuda bo yu Lechi hòrta kabritu; òf bo tabata kana doblá pa tur e mentiranan ku ta pisa bo konsenshi?
Si bo tin un konsenshi mes.

Alfredo bo a hurami ku ta ami so bo tabata hisa man p’e…pasó mi tabata ponebo rabia asina tantu ku bo tabata pèrdè kabes; ponebo sali fo’i bo kueru.
Pero Chichi awor?
Pero Linda awor?
Pero Mama di Shariteenan awor?
Pero Mama di Lechi awor?
Pero e señoranan-ku-ta-Dios-so-sa-nan-nòmber awor?
Nan tambe tabata sufri na bo man? 
Bisami sikiera esaki sí, Alfredo.
Bini den mi soñonan ku ta tormentá mi anochi, bin klarami. 

‘…Ku inmenso doló i tristesa na mi kurason m’a skibi e ‘Letania di Alfredo Ningabon Mentiroso’, mi kasá. Mi ta gradisí tur e hende muhénan i nan yunan ku a klara mi bista. Boso atenshon tabata un doló inmenso pa mi. Alfredo mi kasá a bai sosegá i ami lotin ku wak kon lomi por haña e pas mental pa mi por drumi anochi ora mi kabes topa ku kusinchi …’

Na nòmber di su esposa: lona Mentiroso-Taylor