Fernando A. Rubiano

Na e momento aki mi ta disfrutá di mi penshun despues di a traha na gobièrnu henter mi bida profeshonal. Mi ta di papanan kolombiano ku a imigrá pa e isla bendishoná akí. Mi ta un hòmber di kòmpiuter di tur tempu, pero semper mi tabatin hopi kariño i interes pa idioma. Mi lenga materno ta spañó, pero banda di esaki semper m’a dediká tur tempu i atenshon na nos papiamentu, pero tambe na franses, ulandes i na ingles. Mi tin un LO den spañó. Mi a bai varios kurso di Alliance Française i m’a asistí na vários tayer di skirbi kuenta. 
Despues ku m’a baha ku penshun, m’a hinka un gran parti di mi tempu i energia mental na skirbimentu. I mi ta enfatisá riba tempu i enerhia mental, pasobra e arte akí ta kos serio. M’a siña ku skirbi prosa no ta djis buta un sèt di frase riba papel. M’a siña ku loke mi konta ta importante pero mes importante ta kón mi ta kont’é. Si mi prosa logra transmití emoshon, esta miedu, spantu, impreshon, shòk, legria, humor, sorpresa, ets. na e lesadó, e ora ei ma hasi un bon trabou. I esei semper ta mi meta. Esei ta mi satisfakshon.